විවාහය පිළිබඳ කතා කරන විට ජ්යොතිෂයන්, නවීන විද්යාවත්, බුදු දහමත් අතර විශාල සබැදියාවක් අපට දක්නට ලැබේ.
"නානත්ථි කාය - නානත්ථි සංඥාය"
අදහස් දෙකකින් යුත් පුද්ගලයන් දෙදෙනකුට ගැටුමකින් තොරව එක මඟ යා නොහැකි බව ලොව්තුරා බුදුරජාණන් වහන්සේ මීට වසර 2600 කට පෙරාතුව වදාළ සේක.
යථෝක්ත කරුණ මුදුන් පමුණුවා ගැනීමට ජ්යොතිෂය පිටුවහලක් කර ගනිමින්, ආදරය විවාහයකට පෙරළී දීර්ඝකාලීන අභිනව ගමනක් යාමට සූදානම් වන මොහොතේ පොරොන්දම් විනිශ්චය තුළින් එකී ගමන එළි පෙහෙළි කර ගැනීම හෙට දින පතිකුලයට පිවිසෙන ඔබගේ වගකීම වේ.
පොරොන්දම් යනු පුරුකෙන් පුරුක බැඳුණු, එසේත් නොමැති නම් ආත්ම ගණනාවක් පුරාවට ස්නේහයෙන් බැඳුණු යුවළක්, යුවතිපතීන් වීමට සුදුසුද යන්න වග ජ්යොතිෂය න්යාය ධර්මයට අනුව නිවැරදිව වටහා ගැනීමේ ක්රමවේදයකි.
කේන්ද්රයක මූලික වශයෙන් ඇති වන දෝෂ අතර බහුම දෝෂය හෙවත් කුජ හත් වැන්නේ පිහිටීම, (මීට පෙර අවස්තාවන් වලදි අපි කතා කළෙමු) ශනි හත් වැන්නේ පිහිටීම, රාහු හත් වැන්නේ පිහිටීම පිළිබඳව ඇසූ සැනින් තරුණ තරුණියන් භීතියට පත් වන්නා වූ ග්රහ පිහිටීම් වේ. නමුත් කේන්ද්රයක රවි හත් වැන්නේ පිහිටීම සම්බන්ධයෙන් ජ්යොතිෂය කෙබදු න්යාය ධර්මයක් අනුගමනය කරන්නේද යන්න පුවත් පත් මගින් හෝ වෙනත් ජනමාධ්යයන්ගෙන් හෝ නොඇසූ දුර්ලභ කාරණාවක් වන බැවින් මේ මගින් පාඨක ඔබව ඒ සම්බන්ධයෙන් දැනුවත් කිරීමට සිතුවෙමි. මන්දයත් මේ රවි හත් වැන්නේ පිහිටීම ද යම් දෙපළකගේ විවාහයකදී අවධානය යොමු විය යුතුම අංගයක් වන බැවිනි.
යම් බිරිඳකගේ කේන්ද්රයේ හත් වැන්නේ රවි ග්රහයා බලවත්ව පිහිටීමෙන් තමන්ගේ ස්වාමියා හා ඔහුගේ පාලනයෙන් මිදී ඇය එක් දිනකට හෝ නිවසින් පිටවී ඇයගේ මහ ගෙදර බලා යාම සිදුවේ. මෙවැනි තත්ත්වයක්දී විවාහ ජීවිතයේ ගැටලූ ඇති කරවන බැවින් විවාහයට පෙර පොරොන්දම් ගැලපීමේදී ජ්යොතිෂවේදියාගේ අවධානය අනිවාර්යයෙන්ම මේ වෙත යොමු විය යුතුය.
ස්ත්රියගේ හෝ පුරුෂයාගේ කේන්ද්රයේ රවි හත් වැන්නේ හෝ වෙනත් රාශියක පිහිටියා වූද එකී රවි ග්රහයා එක් පාර්ශවයක දුබලව පිහිටිය යුතුවේ. දෙදෙනාගේ ම රවි ග්රහයා බලවත් වී පිහිටීම විවාහ ජීවිතයට ගැටලු බාධා ඇති කරයි.
සකල ලෝක සත්වයාගේ පැවැත්ම සහ චර්යා පද්ධතිය සඳහා සූර්යයා ප්රභාව, ශක්තිය අත්යාවශ්යමය. නව ග්රහයන්ගෙන් ප්රමුඛත්වය දරන හිරු ග්රහලොවේ රජු ලෙස හැඳින්වේ. රවිගේ බලයට සෙසු ග්රහලෝක සියල්ලම යටත් කර ගනු ලබයි. ඒ නිසා රවි ග්රහයා පහසුවෙන් කෙනකුට අවනත නොවන, දෙවැනි නොවන, හිස නොනමන ලක්ෂණයන්ගෙන් සමන්විත වේ.
කිසියම් පුද්ගලයෙකුට රවිගේ බලපෑම ලද විගස ඒ පුද්ගලයා තුළ මහත් ආඩම්බරයක් නැතහොත් අභිමානයක් නිතැතින් උපදී. ඒ අනුව පුරුෂයාගේ කේන්ද්රයේ රවි බලවත් ලෙස පිහිටා ඇත. ස්ත්රියගේ කේන්ද්රයේ ද රවි බලවත් ලෙස ස්වක්ෂත්රයි, උච්චයි, මූලක් ත්රිකෝණයි" එසේ නම් මේ දෙදෙනාට දෙදෙනා හිස නොනමන යටත් නොවන තත්ත්වයක් පෙන්වයි. මේ හේතුවෙන් විවාහ දිවියේ නිරන්තර ගැටුම් ඇතිවේ.
විවාහ දිවිය සොඳුරු ලෙස පවත්වාගෙන යාමට නම්,
එම කැදැල්ලේ එකමුතුකම තිබිය යුතුය. ගැටලු සහගත තත්ත්වයන් පැන නැගුණු අවස්ථාවකදී බිරිඳ හෝ ස්වාමියා යන දෙදෙනාගේ එක් පාර්ශවයක් අනෙකා හමුවේ යටත් විය යුතුය. නිහඬ විය යුතුය. තමන්ගේ පරාජය බුද්ධිමත්ව ඉවසීමෙන් විඳ දරා ගත යුතුය.
පහත් ලෙස නොහැසිරීමෙන් හා අනුවණ ලෙස ක්රියා නොකිරීමෙන්, බුද්ධිමත්ව කටයුතු කර පරාජය විඳදරා ගැනීමේ ශක්තියක් ඕනෑම පුද්ගලයෙකුට තිබිය යුතුය. විවාහ ජීවිතය සැපවත් කර ගැනීමට පමණක් නොව මනුෂ්යයෙකුගේ ජීවිතයේ යහපත් පැවැත්ම උදෙසාත් සන්තුෂ්ඨිය, සාර්ථකත්වය සහ ජයග්රහණය ජීවිතයට ළඟා කර ගැනීමටත් එකී කරුණු වඩාත් උපකාරීවේ.
ස්ත්රියගේ හෝ පුරුෂයාගේ කේන්ද්රයේ එක් පාර්ශවයක රවි ග්රහයා ප්රබලව පිහිටියා වූද අනෙක් පාර්ශවයේ රවි දුබලව පිහිටියේ නම් කිසිදු ගැටලුවක් මතු නොවේ. මන්දයත් රවි බලවත් වූ පාර්ශවය අඬදබර ගැටුම් ඇති කරන නමුදු රවි දුබල වූ පාර්ශවය ඊට අවනතව කටයුතු කරන බැවිනි. ගැටලු පැන නැගුණද සුළු මොහොතකින් ඒ සියල්ල යටපත් වී යයි.
බිරිඳගේ කේන්ද්රයේ රවි හත් වැන්නේ බලවත්ව පිහිටීමෙන් ඇය අනිවාර්යයෙන්ම ස්වාමි පුරුෂයාගේ සහ පවුලේ අනෙක් අයගේ යටත් ජීවිතයෙන් මිදී තමන්ගේ මහ ගෙදර බලා එක දිනකට හෝ පිටව යාම ජ්යොතිෂ විද්යාවේ න්යායක් ලෙස සඳහන් කළ හැකි අතර ඒ පිළිබඳ දක්ෂ ජ්යොතිෂ වේදියාට වටහා ගත හැකිවේ. මෙවැනි කරුණු ජ්යොතිෂ විද්යාවේ ගුරු මුෂ්ටි ලෙස සැලකුවද පාඨක ඔබගේ ආදරය නොමදව ලැබෙන නිසාවෙන් ඒ පිළිබඳ නොසගවා හෙළි කිරීමට සිතුවෙමි.
ස්ත්රියගේ කේන්ද්රයේ රවි හත් වැන්නේ බලවත්ව ස්වක්ෂේත්ර වීම හේතුවෙන් මතුවන ගැටලුව පිළිබඳ කතා කළා සේම පුරුෂයාගේ කේන්ද්රයේ රවි හත් වැන්නේ බලවත් වීම නිසාවෙන් ඇතිවන තත්ත්වය කෙබඳුද යන්න පිළිබඳ යමෙකුට ගැටලුවක් මතුවේ.
විවාහ දිවියේදී ඇති වන්නා වූ යම් ගැටලුකාරී තත්ත්වයකදී බිරිඳකට දිව යාමට මහ ගෙදරක් තිබුණද බොහෝ විට පුරුෂයාගේ මහ ගෙදර බිරිඳ වෙසෙන බැවින් ඔහුට යාමට මහ ගෙදරක් නොමැත. හේතුවකින් තොරව ඔහුට නිවසින් පිටව යාමට නොහැකි බැවින් ඔහු බාහිර පාර්ශවයක් සමග කිසියම් පැටලැවිලිකාරි තත්ත්වයක් ඇති කර ගනිමින් ඒ කාලය නිවසින් බැහැරව ගෙවා දැමීමට උත්සාහ දරයි.
ජීවිතය කියන්නේ මහා පුදුමාකාර සුන්දර දෙයක් බව අමතක නොකරන්න. විඳින්න තිබෙන ජීවිතය විඳවීමකින් තොරව අප මේ ගමන යා යුතුය. ඔබේ යුග දිවියට මෙලෙස බලපාන්නා වූ අවහිරතා, බාධක මඟහැර ගනිමින් විවාහ ජීවිතයේ පිරිහීමේ දොරටුව වසා දමා, දියුණුවේ මාවතට ගමන් කිරීමට නම් ඔබ විවාහ දිවියට පා තැබීමට පෙරාතුව ඔබේ පොරොන්දම් දක්ෂ, ජ්යොතිෂ වේදියෙකු ලවා පරීක්ෂා කර ගැනීමට ඔබ වගබලා ගත යුතුය. අපි ජිවිතයේ වැදගත් තීරණ ගනු ලබනනේ ඉතා විරල අවස්ථා කීපයකදී පමණි. එහිදී විවාහයට හිමිවන්නේ ප්රමුඛස්ථානයකි. ඒ මන්දයත් විවාහය යනු අපේ ජීවිතයට එකම වරක් මුහුණ දීමට සිදුවන්නා වූ එක් තීරණාත්මක සංධිස්ථානයක් වන බැවිනි.
මේ සමගම විවාහය සම්බන්ධ තීරණයක් ගැනීමට බලාපොරොත්තුවෙන් සිටින ඔබට උපදේශයක් දෙමි.
ඔබේ ජීවිතය සාර්ථක කර ගැනීමට ඔබ ගන්නා ලද යම් තීරණයකදී දක්ෂ, ප්රවීණ, ප්රසිද්ධිය, රැල්ල මත්තේ ම හැපීමෙන් නිගමනයකට ඒමට වඩා ජ්යොතිෂවේදින් තුන් දෙනෙකුගෙන්වත් ගනු ලබන අදහස් උදහස් ගලපා බලා ඉන් දෙදෙනකු දෙනු ලබන තීරණය නිවැරදි බව සිතා කටයුතු කිරීම යහපත් වේ. එහිදී ඔබට මුහුණදීමට සිදුවන හානිය අවම කරගත හැකි වන අතර ඒකාන්තයෙන් ම යහපත් යුගදිවියක් ගත කිරීමට අවස්ථාව උදාවේ.
ප්රවීණ ජ්යොතිෂවේදී ආචාර්ය මංජුල පීරිස්
